ગઢડા પ્રથમ પ્રક. ૮ વચનામૃત રહસ્યાર્થ પ્રદીપિકા ટીકા

બીજા પ્રશ્નમાં ને ચોથી બાબતમાં શ્રીજીમહારાજે અમારે નરનારાયણની ઉપાસના છે, અને નરનારાયણના પ્રતાપે કરીને હું આત્મા છું એવું વર્તે છે એમ કહ્યું, તથા પ્રથમ પ્રકરણના અઢારમા વચનામૃતની ચોથી બાબતમાં પણ અમારા હૃદયમાં નરનારાયણ પ્રગટ વિરાજે છે. અને અમે અનાદિમુક્ત છીએ એમ કહ્યું છે તથા અડતાલીસમા વચનામૃતની ત્રીજી બાબતમાં પોતાને સત્પુરુષ કહ્યા છે અને નરનારાયણને ભગવાન કહ્યા છે અને પરથારામાં નવમી બાબતમાં સર્વે અવતારો રૂપે પોતે દર્શન આપીને પોતાનું સર્વોપરીપણું જણાવ્યું છે તથા જેતલપુર પ્રકરણના ચોથા વચનામૃતના પહેલા પ્રશ્નમાં ને ત્રીજી, ચોથી બાબતમાં તથા પાંચમા વચનામૃતમાં પહેલી બાબતમાં અમે પ્રગટ નરનારાયણ છીએ એમ કહ્યું છે, તથા અમદાવાદ પ્રકરણના સાતમા વચનામૃતની પહેલી બાબતમાં હું જ પુરુષોત્તમ છું અને સર્વે મારું કર્યું જ થાય છે એમ કહ્યું છે, તે પરસ્પર વિરોધ આવ્યો તે કેવી રીતે સમજવું?

આમાં તથા અઢારમા વચનામૃતની ચોથી બાબતમાં તથા અડતાલીસમા વચનામૃતની ત્રીજી બાબતતમાં શ્રીજીમહારાજ મુક્તભાવમાં રહીને બોલ્યા છે, અને પરથારામાં પોતાનું સર્વોપરી ઐશ્વર્ય જણાવ્યું છે, અને જેતલપુર પ્રકરણના ચોથા તથા પાંચમા વચનામૃતમાં તથા અમદાવાદ પ્રકરણના સાતમા વચનામૃતમાં પોતે ભગવાનપણે બોલ્યા છે. માટે જ્યાં અમે ભગવાન છીએ એમ કહ્યું હોય ત્યાં પોતે ભગવાનપણે બોલ્યા છે એમ જાણવું, અને જયારે અમે ભગવાન છીએ એમ ન કહ્યું ત્યારે  મુક્તભાવે બોલ્યા છે એમ જાણવું.