ગઢડા પ્રથમ પ્રક. ૭ વચનામૃત રહસ્યાર્થ પ્રદીપિકા ટીકા

કયા કયા વચનામૃતોમાંથી સાકાર અક્ષરબ્રહ્મને સમજવા? અને કયા કયામાંથી સાકાર અક્ષરબ્રહ્મથી   પર ને તેના કારણ, આધાર, વ્યાપક, નિયન્તા, દ્રષ્ટા ને આત્મા એવા જે શ્રીજીમહારાજના તેજરૂપ   બ્રહ્મજ્યોતિ જે અક્ષરબ્રહ્મ તેને સમજવા?

ગઢડા પ્રથમ પ્રકરણના સાતમા વચનામૃતની પહેલી બાબતમાં શ્રીજીમહારાજ અક્ષરબ્રહ્મને વિષે અન્વયપણે રહ્યા છે એમ કહ્યું છે તે અક્ષરબ્રહ્મ સાકાર જાણવા. ગઢડા પ્રથમ પ્રકરણના એકવીસમા વચનામૃતની સાતમી બાબતમાં એ અક્ષર બીજે રૂપે કરીને પુરુષોત્તમની સેવામાં રહે છે એમ કહ્યું છે. તે શ્રીજીમહારાજના પ્રકાશરૂપ નિરાકાર અક્ષરધામ છે, તે મૂળઅક્ષરમાં વ્યાપીને તે મૂળઅક્ષર દ્વારે સૃષ્ટિ કરાવે છે તે સૃષ્ટિકર્તા મૂળઅક્ષર તે નિરાકાર અક્ષરનું બીજું સ્વરૂપ છે અને તે સાકાર છે. તેત્રીસમા વચનામૃતના પહેલા પ્રશ્નમાં શ્રીજીમહારાજ અક્ષરરૂપે વર્તે છે એમ કહ્યું છે. એકતાલીસમા વચનામૃતમાં શ્રીજીમહારાજ અન્તર્યામીરુપે રહ્યા છે. ત્રેસઠના ત્રીજા પ્રશ્નમાં ને ત્રીજી બાબતમાં અક્ષરધામ નામે કહ્યા છે. ચોસઠમા વચનામૃતમાં અક્ષર કહ્યા છે, બોતેરમા વચનામૃતના બીજા પ્રશ્નમાં ને ત્રીજી બાબતમાં અક્ષર કહ્યા છે, અને ચોથી બાબતમાં “અક્ષરબ્રહ્મના આત્મા છે. અને તે અક્ષરને પોતાની શક્તિએ કરીને ધરી રહ્યા છે ને તે અક્ષરથી ન્યારા છે." તે અક્ષર સાકાર જાણવા. સારંગપુર પ્રકરણના પાંચમા વચનામૃતના બીજા પ્રશ્નમાં ને ત્રીજી બાબતમાં શ્રીજીમહારાજ અન્વયપણે રહ્યા છે. કારીયાણી પ્રકરણના આઠમા વચનામૃતની પહેલી બાબતમાં "નિર્ગુણસ્વરૂપ અક્ષરનું આત્મા છે." દશમા વચનામૃતના પહેલા પ્રશ્નમાં ને ચોથી બાબતમાં "અક્ષર જેવો થાય" એમ કહ્યું છે.  લોયા પ્રકરણના ચોથા વચનામૃતના બીજા પ્રશ્નમાં ને છઠ્ઠી બાબતમાં અમારા જેવો થવાને અક્ષરપર્યંન્ત કોઈ સમર્થ નથી. સાતમા વચનામૃતના ત્રીજા પ્રશ્નમાં ને આઠમી બાબતમાં અક્ષરથી પર શ્રીજીમહારાજને કહ્યા છે. દશમા વચનામૃતના છઠ્ઠા પ્રશ્નમાં ને આઠમી બાબતમાં અમે અક્ષરના આત્મા છીએ. તેરમા વચનામૃતના બીજા પ્રશ્નમાં "અક્ષરને પણ ભગવાન ન કહેવાય." પંદરમા વચનામૃતના પાંચમા પ્રશ્નમાં અક્ષર કહ્યા છે. સત્તરમા વચનામૃતના પાંચમા પ્રશ્નમાં ને સાતમી બાબતમાં અક્ષરને શ્રીજીમહારાજે પોતાની શક્તિ કહી છે. અઢારમા વચનામૃતની બીજી બાબતમાં અક્ષરનો ભાવ અમારે વિષે આવે એમ કહ્યું છે. અમદાવાદ પ્રકરણના ચોથા વચનામૃતની પહેલી બાબતમાં અક્ષરાતીત મુક્તના નિયન્તા છીએ. પાંચમા વચનામૃતના પહેલા પ્રશ્નમાં "અક્ષરાદિક મુક્તને નિયમમાં રાખવા સમર્થ છે", છઠ્ઠા વચનામૃતના બીજા પ્રશ્નમાં ને ત્રીજી બાબતમાં ''અક્ષરાતીત મુક્તના સ્વામી ને પરબ્રહ્મ પુરુષોત્તમ તે જ આ સત્સંગને વિષે વિરાજમાન છે", ગઢડા પ્રથમ પ્રકરણના એકાવનમા વચનામૃતમાં તથા ત્રેસઠમા વચનામૃતના ત્રીજા પ્રશ્નમાં ને ત્રીજી બાબતમાં તથા સારંગપુર પ્રકરણના સત્તરમા વચનામૃતની પહેલી બાબતમાં અક્ષરધામ નામે કહ્યા છે. એ વચનામૃતોમાં સાકાર અક્ષરબ્રહ્મ સમજવા.